اے میرے مولا مجھے حج پر بلا
مدّتوں سے ہے مری یہ التجا
کاش میں بھی دیکھ لوں کعبہ ترا
تجھ کو دیتا ہوں نبی کا واسطہ
اے میرے مولا مجھے حج پر بلا
جب پڑے گی کعبے پہ پہلی نظر
بھول جاؤں گا غمِ قلب و جگر
مشکلوں سے ہوگا دل میرا رہا
اے میرے مولا مجھے حج پر بلا
خوش نصیبوں میں مرا بھی نام ہو
روضۂ سرکار پر اک شام ہو
آرزو اور کچھ نہیں اس کے سوا
اے میرے مولا مجھے حج پر بلا
واسطہ تجھ کو شہِ ابرار کا
فاطمہ کا، حیدرِ کرّار کا
مجھ کو بھی زائرِ مدینہ کا بنا
اے میرے مولا مجھے حج پر بلا
یا خدا دے موت شہرِ یار میں
یعنی پائے احمدِ مختار میں
ہے دلِ راغب کی بھی یہ التجا
اے میرے مولا مجھے حج پر بلا
